Májilistiń Qazaqstan halqy Assambleıasy atynan saılanǵan depýtattary, atap aıtqanda, Rozaqul Qalmuratov Premer-mınıstr Kárim Másimovke depýtattyq saýal joldaı otyryp, jyldaǵy ádetke baspaı, Táýelsizdik kúni tıisti deńgeıde toılanbaıynsha, jańa jyl qamyna kirisetinderge shekteý qoıýdy suraǵan. Bul týraly Bnews.kz habarlaıdy.
«Táýelsizdik kúni – jas memleketimiz úshin birtutas eldiktiń, yntymaqtyqtyń, salaýat pen bolashaqqa degen úmittiń merekesi. Endeshe, bar ıgiligimizdiń bastaýy bolǵan Táýelsizdigimizdi baǵalaý úshin Táýelsizdik merekesine deıin jańa jyl merekesine qarqyndy daıyndyq júrgizýge órkenıetti shekteý qoıyp, Tuńǵysh Prezıdent kúni men Táýelsizdik kúnine aýqymdy túrde daıyndyq júrgizýdi jáne ótkizýdi Úkimettik deńgeıde qolǵa alynýy tıis dep sanaımyz. Bul máselege qatysty jaýapty jazbasha túrde jarıa etseńizder»,- degen depýtat. Depýtattyń aıtýynsha, jaqynda kúntizbege engizilgen Tuńǵysh Prezıdent kúni men Táýelsizdik kúni jyldan-jylǵa shyrshanyń kóleńkesinde qalyp qoıady.
«Jeltoqsan aıy bastalmaı jatyp, elimizdiń barlyq qalalarynda Jańa jyl merekesine daıyndyq bastalyp ketedi. Bıik ǵımarattarǵa quttyqtaý sózderi ilinip, mıllıondaǵan aqsha jumsalyp, shyrshalar ornatyla bastaıdy. Biraq, Jańa jylǵa deıingi elimiz úshin úlken merekeler – Tuńǵysh Prezıdent kúni men Táýelsizdik kúni meıramdary týraly eshqandaı aqparattar kezdestirmeısiz. Tek qana úsh-tórt kún qalǵanda Buqaralyq aqparat quraldarynda, keıbir baǵdarlamalarda júgirtpe joldar berile bastaıdy. Bul Táýelsizdik kúnin Jańa jyl merekesiniń, shyrshanyń kóleńkesinde qalyp qoıatynyn kórsetedi. Eger biz ult retinde táýelsizdigimizdi qadir tutsaq, eń aldymen osy meıramdarǵa kóńil bólýimiz kerek. Biz jańa jyldy toılaýǵa, qalalardy, eldi mekenderdi bezendirýge, shyrshalardy ornatýǵa qarsy emespiz. Biraq, aldymen Tuńǵysh Prezıdent kúni men Táýelsizdik kúnin merekelegennen keıin jańa jyldy qarsy alýǵa kirissek te bolar edi ǵoı. Jeltoqsan aıyn Tuńǵysh Prezıdent kúni, Táýelsizdik kúnin toılaýmen ótkizýdiń tárbıelik, taǵylymdyq máni qanshalyqty zor ekeni belgili. Sol sebepti, Úkimetke jeltoqsannyń birinshi jartysynda osy merekeler rýhyna sáıkes, kósheler men qalalardy Elbasynyń alýan túrli qyzmetin kórsetetin, Táýelsizdik rýhyn tanytatyn plakattar men stendter, jaryq berýshi tablolarmen bezendirip, júıeli túrde halqymyzdy, jastardy otansúıgishtikke, birlikke, qoǵamdyq kelisimge shaqyratyn is-sharalardy uıymdastyrý úshin tıisti mınıstrlikterge jáne jergilikti atqarýshy organdarǵa tapsyrýdy usynamyz», - dep tuıindegen óz sózin Qalmuratov.
Qazaqstanda jyl saıyn jańa jyl depýtat aıtqandaı úrdiste toılanady. Jańa jylǵa bir aı ýaqyt qalǵan sátten bastap kósheler, memlekettik mekemeler bezendirilip, shyrsha sándeledi. Memleket aýmaǵynda myńdaǵan shyrshalar tigilip, onda eki aı boıy jarqyldap, qaptaǵan shyraqtar janyp turady. Esesine Qazaqstannyń táýelsizdik kúni tek birneshe kún ǵana atap ótiledi, án uran aıtý men shaǵyn jınalystar ǵana uıymdastyrylady. Eske salatyn bolsaq, sońǵy jyldary qazaq tildi jýrnalıster depýtat aıtqan máseleni úzbeı jazyp kele jatqan bolatyn.
